Dende a praza de abastos de Pontecesures vivimos unha experiencia radiofónica que nos fixo viaxar no tempo para rememorar aqueles anos 40 e 50 nos que chegaba a radio aos fogares da vila.

O alcalde de Pontecesures, Juan Manuel Vidal, acolleunos na súa vila para presentarnos a un radioaficionado de excepción, Francisco Enrique Souto, que atesoura máis de cincocentas radios de tódolos tempos e tecnoloxías. Con él rescatamos a memoria da radio.

Ata o programa, e a través do fío telefónico, achegouse tamén o delegado da Xunta en Pontevedra, Luís López Diéguez, amante da bicicleta e do Camiño de Santiago. Rosana Estévez Palmero, hostaleira local, falounos de como o sector se adapta á demanda das e dos peregrinos sen esquecer ao consumidor local e a todo tipo de turistas.

Carlos González Paz, do instituto de estudos galegos Pai Sarmiento, deunos pinceladas da historia das distintas rutas do Camiño de Santiago e compartiu con nós os segredos do proceso de investigación.

José Luís Salgado Madriñán é un dos cinco membros da Orden de Malta que naceu co obxectivo de axudar aos e ás peregrinas coa creación de albergues, roupeiros e mesmo hospitais onde atendelos. Con él, tamén conversamos.

Rematamos o programa falando do futuro de Pontecesures co alcalde e co arquitecto municipal, Carlos Besada, que nos achegou ás novas tendencias en urbanismo.

Hosted on Acast. See acast.com/privacy for more information.

A historia de Palas de Rei preséntase intimamente unida á cultura castrexa, conservando aínda hoxe numerosos restos arqueolóxicos (mámoas, dolmens e castros) testemuña dun remoto asentamento.

O románico entrou polo Camiño de Santiago, deixando a súa pegada na arquitectura relixiosa, destacando a igrexa de Vilar de Donas, un dos referentes principias do románico galego, declarada en 1931 monumento histórico-artístico. As súas pinturas murais forman un dos conxuntos máis destacados e mellor conservados de Galicia.

O alcalde Pablo José Taboada recibiunos na Casa do Concello para gravar este programa no que, xunto a Manuel Escaríz e Raúl López, falamos dos comezos da radio en Palas de Rei e do importante que foi nas súas vidas de emigrantes ter a compaña da radio para mantelos preto do seu fogar de orixe.

A responsable da radio local tamén quixo participar para falar da importancia que ten na actualidade radio Palas, informando a diario á veciñanza das cuestións que máis lle afectan e recollendo o seu sentir.

Emprendedores locais como Nieto, Johan e Óscar, que apostaron por Palas e retornaron da capital do Estado para iniciar os seus negocios, completaron o programa coas súas experiencias.

A popular xornalista e presentadora do programa radiofónico “Gente Viajera” en Onda Cero, Esther Eiros, relatounos as súas mellores experiencias de viaxes e achegounos os seus consellos e predileccións á hora de viaxar.

Hosted on Acast. See acast.com/privacy for more information.

A construción do encoro de Belesar fixo de Portomarín un lugar enigmático e cheo de misterio ao que se achegan milleiros de peregrinos. Nas súas rúas e nas prazas respírase vida e o balbordo dos peregrinos enche de diferentes linguas cada recuncho.

Portomarín o novo creouse a mediados do século XX nas terras altas do monte do Cristo na marxe dereita do río Miño. As obras comezaron no 1956. Portomarín o vello dorme baixo as augas do encoro de Belesar. A vila trasladouse ao Monte do Cristo debido á construción do pantano.

O alcalde Pablo Rivas e o persoal municipal relátannos as lembranzas herdadas dos tempos nos que unha vila enteira tivo que dicir adeus aos seus fogares e reiniciar a súa traxectoria vital. Tamén con elas e eles reviviremos os momentos ao carón da radio.

Para falar da evidente e sorprendente relevancia do Camiño de Santiago e Portomarín acompáñannos os hostaleiros locais Diego e Ismael, tamén Luís Alberto, peregrino de León que percorre en bicicleta esta ruta. Non podía faltar o director de SI RADIO en Lugo Eloi Caldeiro, unha das persoas con máis coñecimento do camiño de Santiago o seu paso por esta provincia.

Na praza do Camiño, diante do Concello e da igrexa de San Nicolás movida pedra a pedra cando a construción do embalse, foron moitas e moitos os que se achegaron para falarnos de como escoitaban a radio as súas familias e tamén do encontro de culturas que provoca o paso do Camiño de Santiago.

Hosted on Acast. See acast.com/privacy for more information.